An sabi kaidto sako kan sarong tiyaon kong bokalison: “Ay, ate! Usmakon kan aki ka. Dai mo pag-isipon na ilusyunan an daragitang kataning mi ta primahon mo pa an.”
Buot sabihon, sing-aki ko pa daa. Pinsan. Kadugo. Kaya, bawal mamiday kaidtong mga dekada ’90 kan an Caramoan mayo pa lamang sa isip kan mga turista. Mga Caramoanon an sa parte na Lola. Basiño sinda. Kastilaloy. Bago pa naagom kan Breis. Sa Basiño man gikan an ina ni Ely Basiño Buendia kan Eraserheads. Duwa kuta kaming sikat ni Ely sa angkan kun nadagos akong magin bold actor sa mga pelikulang horror. Horrorosan ki brief(s) o kalson. Hugak na kuta akong magbwelta sa Caramoan pag bakasyon ta mala ngani maano man duman kun gabos na magagayon bawal man pasyaran. Gabos sinda kadugo mi daa. Puon Salvacion o Lipata o iba pang barangay asin hanggang sentro. Sarong aldaw, sa bulod ako nakaampos, harani sa masulog na salog asin inabot ako nin banggi. Asin ito su inot buda huri kong pakahiling nin kahoy na marambungon nin labi-labing aninipot. Marambong nanggad an kabilugan asin sa diklom, paghuna mo sarong nakalataw na liwanag, biyong naghahangos. Rumdom ko na kan mga oras na ito, kinaptan ko an sakong daghan asin pagmati ko, su kahoy buda ako… saro man saná. Sarong hinangos asin kurab-kutab. Pag-abot sa harong na garo dai pa ako naulian, ulukon su tiyaon ko. Baad daa mabua ako ta bakasyon daang naunabi alagad mayo man nin nakakaulay. Maray pa daang umuli na sa Tabaco.
Aram ko, sa ngunyan, bako mi na man gabos kadugo an mga babayi sa Caramoan asin haluyon na akong dai nakabisita duman. Lampas- trayntang taon? Alagad iyo. Su kahoy nin mga aninipot kan bangging ito na pitsuon an diklom—nasa daghan ko pa hanggan ngunyan. Kurab-kutab nin kagayunan na daing kasagkuran.
Sabi ngani kan mga gurang, bukudon daa an gabos na kayang dakupon kan daghan. Bako sanáng su mga kayang dakupon kan mata. Nasa daghan daa an tunay na pagmaan.
0 Comments