Inabot ko pa kaidto su Perdon na piggigibo sa mag-agahon. Mga alas tres asin matatakot ka talaga ta malà, madiklom pa, tapos bigla na sanang may mga garo naghaharaya sa pagkanta. Minasirip ako kaidto sa bintana ming jalousies asin garo puro nagraralakaw na anino sana su mga nagpuprusisyon, dai malampas sa trenta asin dagos an pagkanta na karayaton, magabaton pagdangugon:
Patawara Dyos ko,
Dyos ko patawara.
Patawara O Senyor
an gabos kong sala…
An gibong usipon kaidto kan mga tambay na kontra-Perdon, puro daa mga gurangon man sana an nag-iiriba ta madali na sindang magkagaradan. An totoo, anggot su ibang mga tambay ta alas tres na alagad mauruli pa sana sinda harali sa irinuman, masasabatan sa dalan su mga gurang asin su pinakamakusog an boses na kantora, haros ikurahaw na sainda su… Dyos ko patawara.
Krus na may sarong dupa an laba an nasa inutan kan Perdon asin sarong kandila o gasera o kun minsan karaba an dara sana—an mga ini an inabot ko na kan tinugal ako kaidto kan tiyaon ko na mag-iba kaya tuom ko kaidto pa an bilog na Patawara.
Tapos na an Martial Law kaidto alagad igwa pa nin selektibong curfew asin dakol pang mga militar an nagkatarada sa samong barangay na agihan palugsot sa may pyer. Pag nasasabatan kan mga suldados an Perdon, igwa sainda nin minapanguros alagad igwa man nin minapadangog arog kan “Imbes magkaraturog, nagpaparapuruka. Idaramay pa an Dyos.”
Sa ibang lugar, pag talagang may curfew pa, dai talaga itugutan an Perdon pag alas tres. Kaya igwa kaidtong mga alas otso pa sanang banggi, nagpupuon na an naunabing prusisyon maski dai sinda uyon sa nabagong oras.
Dakul an takuton talaga sa Perdon na buminalik man giraray sa mag-agahon na kinatùdan. An paborito ko kaidtong usipon na luminakop samuya iyo idtong su mga gurangon na kurubaon na ngani daa pag nahiling mo sa aga alagad pag nasa Perdon na sinda, biglang taranuson na daa an lakaw sa diklom. Alas tres na maagahon daa pàno an totoong oras kan mga kalag na nagbarasay-basay.cAn iba daang kalag, nakikipagprusisyon man. Saralakan an mga gadan asin mga buhay pa.
An sabi ni Pay Ipil kaidto, may pirang mga soldados asin mga NPA daa—mga parehong takot man sa nasabing usipon. Kaya daa, marhay man ta dagos baga kaidto an lambang Perdon. Sabihon pang harani na daa kaito an pigsasabing Rebolusyon.
.
0 Comments