Sa sarong forum sa Manila bago maglockdown dahil sa pandemya, nagin tema sa pag-urulay an kamugtakan kan mga nagkakaedad na. Positibo su paghiling sa mga benepisyo para sa mga senior citizen na dulot kan R.A. 9994 (Expanded Senior Citizens Act of 2010). Halimbawa kaini an 20% na discount sa mga bulong buda mga serbisyo arog sa mga gastos kun nagpapahospital, kun nagkakakan sa restawran, o kun nagbibyahe bus man o eroplano.

May mga reklamo sa bakong perpektong implementasyon kan ley pero positibo an paghiling sa Expanded Senior Citizens Act. Sa tahaw kan positibong paghiling sa ley, may luminuwas na isyu na nabalanganan sana. Sa sarong pag-adal manungod sa serbisyo para sa mga senior citizen, luminuwas na an nagkikinabang ki marhay kan 20% discount iyo idtong mga nagretire na sa trabaho o idtong hali sa lower middle income paitaas na may dati nang seguridad sa saindang pinansyal na pangangaipo bilang may mga edad na. Ta ining grupong ini iyo an nakakapa-hospital, nakakabyahe kun gusto ninda, o nakakakakan sa mga restawran. Gamit na gamit ninda an saindang senior citizen’s card. Alagad, an tios na senior citizen dai ngani kun minsan na pakinabang sa 20% discount.

Ngonian, igwa na man na pension na Php500 kada bulan an indigent senior citizen buda may automatic nang Philhealth na benepisyo kun naku-confine sa government hospital. Liwat, bakong perpekto an implementasyon kan ley pero igwang pagreparo sa nagkakaedad an satong banwaan.

Alagad an hapot: Gurano ka-mapinadaba an Pilipinas sa mga senior citizens na tios?

An satong banwaan may pagpahalaga sa mga may edad nang namamanwaan. Alagad, sa dalagan kan panahon na urog na nagtitios an kinapobrehan, may mga pangangaipo an mga senior citizens na dai  napapanuan, arog kan marhay na nutrisyon buda pagmidbid kan mahalagang papel kan mga lolo buda lola sa luwas kan pag-ataman kan mga makuapong winawalat sainda ta nagtatrabaho an mga aki ninda sa sadiring lugar o sa ibang nasyon.

An mga senior citizen dai dapat magruro an saindang kumpyansa sa sadiri huli lamang sa edad. Sa agimadmad kaya na nabahidan ki maray kan kapitalismong kaisipan, an paggurang ibinabaing sa produktong nalipasan na kan panahon, buót sabihon, pwede nang darahon na sana sa bodega o isubasta. Ini an kaisipan na dapat suagon kan banwaan ta ini an ulang sa pagpadaba sa mga may edad.

Apwera sa mga pangangaipong pisikal arog kan pagkakan, bulong, o istaran, an pagmati na kaparte kan arualdaw na normal na aktibidad an mga senior citizen mahalaga. Namumundo an senior citizen na an pagtrato sainda sa gilid na sana sinda, na an mga pigsasabi ninda dai na pigtatawan halaga. Kaya ngani nadadangog ta an linyang “magurang ka man” dahil nababaliwala an mga ideya kan senior sa kadaklan na beses.

An pagtrato sa may edad na na daing paghusga sa mga idea ninda bilang kontribusyon sa banwaan sarong makusog na tanda nin pagpadaba sa mga tawong uminagi na man sa pagsirbi sa banwaan kaya dakul na liksyon an pwede pa nindang ihiras sa pagtugdas nin banwaan na mapinadaba asin patas an paghiling sa man-iba-ibang sektor.