Sa apat na taon ko na ngunyan sa pulitika dakul na akong napapatunayan—bako sa sadiri ko kundi sa paghiling ko sa mga tawo, urog na duman sa direkta kong mga pinagsisirbihan. Sa hiling ko, siring man kaini an ekspiryensya kan nagkapira, kun bako man kan kadaklan.

Aakuon ko na kaidto nagtubod man ako—asin natakot pa ngani—sa kadakol na salang pagtubod manungod sa mga tawo.

Panginot sa mga ini iyo an paghunà na an mga tawo marurumduman saná si salâ tang naginibo dawa dakol pa kitang naginibong marhay o tama.

Totoo man na may dakulang epekto an anuman na kasàlan, urog na kun ini sarong iskandalo alagad bako ini an kaintiruhan kan istorya. Madali man naggad na matahuban an anuman na marhay tang naginibo kan anuman na pagkakasalà, alagad, sa kahurihurihi, sa panahon na nagtundag na an anuman na isyu, urog man giraray na  narurumduman kan kadaklan si marhay mong mga naginibo.

Sinasabi ko ini bako tanganing kunsintihon an ano man na kasàlan, urog na kan sarong lider na tiniwalaan kan banwaan.

An siisay man na pulitiko—gurano man kadakula—igwa nin paninimbagan sa mga tawo kaya maninigo man talagang iskusaron tang dai kita mapasalâ sa gabos na momento, asin kaipuhan man na sa lambang maraot tang desisyon hinahampang ta an kastigo.

Sinasabi ko saná ini tanganing inkaminaron an siisay man na lider na padagos saná an pag-isip ta nin karahayan asin padagos saná an pagsumikap tang magin matanos. Dai ta pagparaisipon na “kakastiguhon  man saná kita kun kita mapasala, kayâ ano pa man ta magin marhay pa kita?”

Ta, totoo, an tawo mapagkastigo alagad sinda mapagpatawad man.

Totoong an satuyang mga naginibo natatahuban kan saro sanáng pagkakasalà, alagad totoo man na sa saro sanáng marhay na gibo pwede man kitang makabawi, urog na kun nahiling kan namamanwaan na kita nagbasol. 

.