Sa kasagsagi kaining community quarantine, pinagmarhay kong mabisita an Bani, saro sa pinakahaharayo ming barangay sa Banwaan nin Tinambac. Bilang sarong lehislador kan samuyang banwaan, nagtutubod akong labi nanggad ka-importante an paglakaw-lakaw sa lugar na nasasakupan urog nang gayo duman sa mga pwera, ta pàno mo man maaaraman kun ano an mga polisiya asin mga batas an kaipuhan mapunan asin maipautob kun dai mo man aram an kamugtakan kan saimong konstitwente.

Sa pagbisita sa Barangay sa kanto kan San Miguel Bay, liwat kong nareyalisar an importansya kan tamang impormasyon sa pagsiguro na marhay an buhay kan mga tawo. Ini pagkatapos maiistorya kan Punong Barangay o Kapitan duman na igwang sarong banggi sa Bani na naribusak asin napurisaw an mga tawo ta igwang taga-Barangay an namareta na subuot igwang umboy ba namundag sa Albay na pagkapangakia tulos nagsabi subuot na an bulong sa CoViD19 iyo an pagruprop nin sugok. Kaya sabi ni Kapitan, maski banggi na, nagbangon si mga tawo ta nagkua nin mga sugok tanganing kakanón maski hilaw. 

Sabi ko ki Kapitan dai totoo an bareta na idto asin dai totoo na makakabulong idto sa CoViD19 ta dai pa man ngani nin naiimbento o nadidiskubre na bulong. Urog nang dai man totoo na nakakabulong an sugok. Sa katutuuhan, delikado an pagruprop kaining hilaw ta pwedeng kontaminado ini nin Salmonella, na delikadong marhay sa tawo kun makalaog sa ginhawa. 

Arog kaini kahalaga an tamang impormasyon sa buhay kan mga ordinaryong tawo. Sa iba satuya madali sanang magpalakop  nin kun anu-anong istorya na dai iniisip an kunsekwensya urog na sa mga tugang tang kulang an pagkasabot. Pwedeng sa iba satuya karaw saná, alagad sa iba buhay na an nakataya.

Kaya ngani bilang sarong opisyal, nagtutubod ako na urog kong kaipuhan na maging maingat sa mga hinihiras kong impormasyon, ta an sarong opisyal importante na igwang kredibilidad asin kun ika igwa kanii mas dakula man an responsibilidad mo na magin mas maingat sa mga impormasyon na hali saimo ta dakol an nagtutubod asin pwedeng magtubod saimo. Saro sanáng balubagi, tuyo man o dai, pwedeng buhay asin karahayan kan bilog na komunidad an madanyaran. 

Kun uugkuron, dakulang parte kan paggobernar an pagtao nin tamang impormasyon asin paghiras nin beripikadong mga ideya sa mga tawo. Masakit, totoo, alagad sa oras na maliwanag, malinaw, asin totoo an impormasyon, mas madaling makumbinsi an mga tawo na gibuhon man an saindang parte, urog na sa panahon nin krisis. Kadaklan na malain na tuyaw kun iisipon dara sanea man kan dai malinaw na pagpasabot. Dakol na programa, dawa gurano pa karahay, an nararawrawan kun dai man ipinapaliwanag nguna sa mga namamanwaan. 

Dakulon kitang gustong gibuhon asin mahaman para sa satuyang banwaan o syudad, alagad ini imposible kun mayong tama asin epektibong riribayán nin kaaraman urog na sa panahon na dakulon an gustong mainot magpaisi alagad didikit an makusog an buót na saráon nguna an tama sa sala.

.