Turog na ngunyan an KBP Community Advisory Board.

Pigmukna ini kan KBP National asin kan Broadcast Media Council kan dekada ‘70 sa inot na mga aldaw kan Martial Law sa panginginot kan bantog na parasurat asin peryodistang si Teodoro F. Valencia.

An katuyuhan kan Kapisanan ng mga Brodkaster sa Pilipinas, na sarong pribadong organisasyon kan mga kag-sadiri nin radyo asin TV stations/networks, na self-regulatory body, iyo na mamanihar an saindang aktibidades pati arualdaw na operasyon kaiba na an saindang negosyo bilang broadcast media organization.

Sabi kan mga nanunungdan sa itaas, dapat an mga ordinaryong namamanwaan, arog kan mga paraantabay nin radyo asin mga paradalan nin TV, iyo dapat an nagmamato kan mga pig-uurulayan sa ere kan mga personahe nin radyo asin TV.

Digdi nagpuon an pagtao nin accreditation examination sa gustong mag-atubang sa mikropono bilang broadcasters, announcers, commentators, news analysts, asin field reporters.

Magayonon na proyektong ini maski kaidtong panahon kan martial law. Duman nagpuon an tataramon na development communication, ta an gobyerno maski poderoso, pinapabwelo an midya sa saindang mga programa tanganing maintindihan an tunay na reaksyon asin sentimyento kan tawo sa mga programa asin proyekto na ginigibo kan gobyerno.

Nagdanay an KBP pati an Community Advisory Board maski nagtalikod na sa kinaban si Doroy Valencia ta suportado kan broadcast media an siring na direksyon kan industriya.

Alagad paglaog kan bagong siglo, puon kan taon 2000 nawara na an CAB sa ibang mga probinsya, pati sa Bikol, apwera sa Camarines Sur.

Kan panahon mga dekada ‘90, aktibong marhay an CAB, mala ta pati an harabunan nin kuryente kan electric cooperatives pigpapakiaraman kaini.

Pinapanginutan nin sarong prominenteng syudadano, bilang chairman, an mga miyembro hali sa manlainlain na sektor kan sosyudad, arog kan negosyo, relihiyon, mga propesyunal, mga parauma, asin iba pa. Nagmimiting sinda regular, kun minsan sirisemana, depende sa mga isyu na dinadaklag sainda kan publiko, pati na hali sa mismong mga tagaradyo asin telebisyon na dapat aksyunan kan KBP asin kan advisory board.

Mayo na yan ngonyan.

Nagkakaigwa sana nin aktibidad an KBP asin CAB kun may induction kan bagong mga opisyal asin kun may spiritual retreat an mga tagaradyo asin TV na ginigibo sa sarong hotel na sadiri kan sarong opisyal kan CAB. Apwera kaiyan, mayo na nin anuman na aktibidad an KBP asin CAB sa laog nin sarong taon ngunyan na mga panahon. Maski ngani an accreditation exam para sa mga aplikanteng announcers mayo pa baga sagkod ngunyan.

Mismong mga taga-midya an naghahapot kun hain na sinda. Inot, grabe na an pagruro kan lenggwaheng Bikolnon sa radyo asin telebisyon. Ikaduwa, pahingurag nang komersyal o pagirumdom sa ere na time check na sana o pagtao nin oras an naisisingit. Sobra na an komersyalismo, mayo lamang nin paseminar na ginigibo an KBP ta mayo naman an Broadcast Media Council o BMC.

Haros 90% kan radyo asin TV sa Camarines Sur, Naga, asin Iriga sadiri nin mga pulitiko asin an mga bareta asin tema sa mga diskusyon puro na sana pulitika.

Mayo nang development communication.

Sabi kan ibang mga paraantabay, pati an mga tugtog sa Christmas o Pasko anas na sana English Christmas carols, mayo nang Tagalog, Pilipino, o Bikol songs na satuya man.

Kaya gusto kan iba na ibalik an Community Advisory Board pero organisado bilang pribadong sektor na magtatagatuyaw kan mga pagkukulang asin kasobrahan kan mga pigtutukar asin pigpapatugtog sa ere.

Kun bako nganyan nuarin pa?