Regional news matters. Local news matters.

Sa anuman na bareta, sa radyo, sa TV, sa prensa, o sa social media man, importante an linggwahe o an gamit na tataramon.

An pigngangalas kan mga Bikolano na nag-aantabay sa bagong TV newscast, urog na digdi sa Kabikulan, iyo na, inot na inot, an titulo kan panhapon na bareta sa telebisyon, Balitang Bicolandia. An bareta sa Bikol bareta, bakong balita.

Tama na an mga lokal na pangyayari digdi sa rehiyon mahalaga sa mga Bikolano asin maski bakong Bikolano na  naka-istar digdi. Sa pagkaaram ko, an gabos na rona kan Pilipinas igwa nin regional news hapon-hapon puon Lunes sagkod Byernes. Marhay ta mga bagong lalawgon an mga parabareta sa telebisyon kan GMA 7 o Kapuso network. Mga Bikolano saka Bikolana pati, mga hoben pa saka garo mahihigos sa pagkalap nin bareta asin impormasyon sa anom na probinsya asin pitong syudad kan Bikol. Napapanahon an mga bareta asin presko.

An problema sana ta garo dai tatao kan linggwaheng Bikol an mga newscasters maski sinda mga taga-Bikol. O tibaad binabasa man sana ninda an mga bareta na pigsusurat kan iba. Sa bagay dapat na may independent news department an lokal na istasyon, kompleto nin legmen, field reporters, cameramen, asin para-interview.

Sa Metro Manila asin sa ibang parte kan kinaban, an news anchor o an parabareta sa TV screen na iyo an pinakasikat, news reader man sana o parabasa man kan bareta. Iyan an inaapod na propesyonalismo sa broadcast media industry.

Saka garo bakong bukas sa mga suwestyones asin rekomendasyones an management kan lokal na estasyon.

Idtong pigribayan na Bikol TV Patrol maski sarala-sala an Bikol, alagad magpuon sa manager, newscaster, asin field reporter, bukas sa mga suhestyon asin pagtuyaw hali sa publiko sa mga pagkukulang kan mga personahe asin kan programa mismo.

Dai pa huri, pwede pang pagayunon an programa tanganing makataong marhay asin magayon na bareta sa mga Bikolano na nagtutubod na an impormasyon sa telebisyon mahalaga sa saindang arualdaw na pagbuhay.