Sunday, December 05, 2021, 9:22pm

Emil Saavedra, editor asin parasurat, alyas Atlas

Published on Sunday, August 23, 2020, 5:22pm

At last, pakaagi nin halawig na panahon, an amigo kong nagpapàsan kan gabos na problema kan kinaban, 75 anyos na, garo dyamante na an kintab asin tagas kan saiyang pagkabuhay.

Ngunyan, wheelchair na an nagkakarga saiya haling Bagacay, Tinambac, pasiring sa Naga, Clupa, Mayon, asin Villa Corazon. Gusto pang mag-wheelchair pasiring Canada sa likod an saiyang pinakapadangat na si Lydia.

Namundag sa Tinambac, duman nagdakula, nag-eskwela sa Ateneo, nagkolehiyo sa Camarines Sur School of Arts & Trades (CSSAT) sa Naga, nagklase nin agrikultura sa CSSAC/CBSUA tanganing mag-adal pag-uma, dangan nag-eskwela sa UNC nin Education, kun sain sya nagsikat bilang editor in chief kan The Nueva Caceres, an pinakadakulang school-based community publication sa Bikol kan dekada 60 sagkod 70, may 5,000 na sirkulasyon sa mga estudyante kan UNC asin para sa publiko—libre, mayong bayad.

Duman nabisto an saiyang abilidad magsurat sa tataramon na Ingles, nagin inspirasyon sya kan mga estudyanteng mahilig man magsurat asin kan kadaklan kan mga chicas kan panahon.

Sa Ateneo man, sa trade school, sa agrikultura o sa UNC, bako sanáng parasurat asin campus editor, kundi student leader pa si Emiliano S. Saavedra Jr., aka “Duyong” sa saiyang pamilya.

Nagin editor in chief sya kan dyaryong Bicol Monitor na sadiri ni Cong. Boboy Alfelor kan dekada 7o sagkod 80. 

Nagin cub reporter sya kan dáan na Bicol Mail kairiba pa sinda Henry Briguera, dipuntong Alex Abad, Jose Camano, asin ining alang-alang pa, maski aktibista, dai sya nagbali sa militanteng Kabataang Makabayan (KM), pero nag-ayon sya sa Conference of National Delegates Association (CONDA), College Editors Guild of the Philippines (CEGP), asin Gamma Delta Epsilon, sarong Greek-letter society sa UNC, asin puon kaidto sagkod ngunyan, myembro kan SDK—o Samahang Double Knit—si Emil. Dai sya nagsusulot nin maong na pantalon o short pants, o ining usong baràbang pantalon kan mga bagong tubo asin senior citizens na nagyayabayaba sa SM Naga.

Sa UNC campus, bilang parasurat asin paramasid kan mga hiru-hiro nin mga tawo, duman na nagpuon an saiyang pagpàsan kan mga problema kan kinaban, maski problema kan gobyerno, problema kan UNC administration, problema kan Malakanyang, problema kan mga NPA, problema kan mga alabado, problemang personal kan mga kababaihan, saiyang pig-iisip kun ano an pinakamarhay para sainda.

Pigmukna nya an grupong Arana Boys na kinukumpunir kan saiyang mga barkada na sinda Shulan Primavera, Ompong Baldemor, Nick Marasigan, Jovito Palo, Pay Pael San Andres, asin Edgar Tuy. Ako ngani palan kabali man.

Pinadakula nya si Johnny Delos Santos, Gerry Claveria, Herculano Sabas, asin Luz Equipado bilang mga parasurat asin outstanding student leaders. Dai sya nagbali sa mga student demonstrations o mass actions ta yaon sya sa gilid, nagmamasid, pigsusurat para sa mga peryodiko an nangyayaring mga aktibidad.

Kan makatapos nin kolehiyo, bilang idealist, nagtukdo sya sa harayong banwaan kan Siruma, imbes na sa Naga o sa Tinambac.

Gulpi syang natukduan na mga kaakian sa magayunon na banwaan na bistado sa mineral na white clay asin kadakol na mga tourist spots. Kaidto pati maagi ka pang dagat para saná makaabot sa banwaan kan Siruma.

Orgulyoso sya kan turismo kan saiyang banwaan, malà ta dinara nya an Arana Boys sa isla kan Kawit, sa Tinambac, asin iba pang magagayon na lugar kan saiyang banwaan.

Duman nagpuon an pag-ragod nya kaaalsa kan mga sakit nin tao. Pigsusurat nya sa saiyang mga editorials asin columns sa mga dyaryong lokal, arog kan Bicol Monitor asin Bicol Mail. Nagsurat sya nin libro dapit sa buhay kan saiyang idol na si Luis R. Villafuerte, na pighahalat pang magluwas sa imprenta. 

Nagprodusir siya nin semanahan na programa sa GMA 7 kan dekada ‘90 na an director si Sammy Garcia asin ako an anchor. 

Nagin OIC Vice Mayor appointed kan Tinambac paka-EDSA Revolution. Pag-eleksyon daog. Nagin PRO sya kan Bureau of Fisheries and Aquatic Resources (BFAR)—an pinakamaugma asin magayon nyang karera sa gobyerno sa lindong kan liderato kaidto ni Director Frank Pili. Nagin PRO man sya ni Kongresman Sal Fortuno kan Rinconada sa Batasang Pambansa. 

Pigmukna nya an MassCom Arts and Affairs na nagprodusir kan pelikulang The Good and the Bad, na istorya kan mga gawi-gawi kan deboto ni Ina. 25 years in the making ini, hapota nindo si Al Ubaña saka si Maribel dela Rosa. 

Gulpihon syang advocacies sa laog kan saiyang isip arog, kan pagsararo kan gabos na mga parasurat sa Bikol. Sya ngunyan an ex-officio chair kan Kantong Putikon (Part II) sa SM City Naga. Kan mabagsik pa sya, arualdaw sya sa SM, nakikipaghuntahan sa mga taga-media, mga pensyonado, mga retiree, asin mga senior citizens. Ultimo nyang piglansar an saiyang Blue Revolution Movement sa laog kan SM ta gusto nyang magka-igwa nin gobyernong Parliamentaryo. Kontra sya sa Pederalismo. Bangit sya kadto ki Jess Robredo, ki Noynoy Aquino, lalo na ki Digong.

Pero ngunyan pig-uumaw nya si VP Leni, na esposa kadtong depuntong JMR. An ultimo nyang mayor na proyekto iyo an pag-areglo kan planong pagbanga kan probinsya kan Camarines Sur kan Fuentebella Dynasty vs. Villafuerte Dynasty.

An magayon ki Emil asin maugma sa buhay nya iyo na suportado syang intiro kan saiyang pamilya, kan agom niyang si Lyd, kan saiyang limang aki, asin mga makuapo.

An plano nya kaidto na itaas an monumento ni Rizal sa plaza kan Naga tanganing mgaka-igwa nin parking area sa irarom gulpi nang nagsusuporta ngunyan.

Iyan an bisyon asin misyon ni Emiliano San Andres Saavedra Jr., alyas Emiliano Zapata, also known as Atlas.

.

Ernie Verdadero
Si Ernie Verdadero saro sa mga beteranong harigi kan radio broadcast sa Bikol. Saro man syang dating elehidong opisyal kan gobyerno asin man artista sa mga pelikulang Bikol.

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.

Importanteng Paisi: An Magbikol Kita minatao nin galang asin nagmimidbid sa katalingkasan kan lambang kag-ambag na parasurat na makapaglahayag kan saiyang personal na ideya, opinyon, o panànaw, sa pagtubod na ini nakasusog saka nakagamot sa pag-adal, pagsaliksik, asin hararom na paghurup-hurop. An indibidwal na mga artikulo dai nagsasalming sa pangkagabsan na paninindugan kan Magbikol Kita.

Kag-ambag na mga Parasurat

Kenneth Isaiah Ibasco Abante

Khryss Arañas

Mae Diane Azores

Nephtaly Botor

Niles Jordan Breis

Luis Cabalquinto

Jethro Calacday

Greg S. Castilla

France Clavecillas

Christian Dy

Maria Leny Felix

Dennis B. Gonzaga

Jaya Jacobo

Jingjin 淨近

Victor John Loquias

Vic Nierva

Pen Prestado

Joseph Reburiano

Adrian V. Remodo

Aika Robredo

Ronald ‘Bong’ Rodriguez

Jenn Romano

Javier Leonardo Vitug Rugeria

Jay Salvosa

Sari Saysay

Jonas Cabiles Soltes

Kerwin Orville Tate

P. Francis Tordilla

Melba T. Vera Cruz

Ernie Verdadero

Magbikol Kita is published by

We create blogs, videos, websites, graphics, and social media content so you can engage customers online and offline. Visit Creative Coconut Ph for ideas and to contact us.

Resibihon an mga artikulo sa email

Magsubscribe sa mailing list kan Magbikol Kita. Resibihon an mga artikulo direkta sa saindong email.

An Magbikol Kita sarong adbokasiyang nagtutulod, nagpapararom, asin nagpapahiwas kan paggamit sa mga tataramon na Bikol sa online na kinaban. Orihinal ining sarong midyum nin paghiras nin kaaraman dapit sa lenggwaheng Bikol para sa mga nagtutukdo asin nag-aadal kan tataramon. An paghimo kan website na ini sarong lakdang nin pagpahiwas kan sakop asin abot kan Magbikol Kita tanganing magin sarong kamalig nin impormasyon para sa mga Bikolnon—asin mga buót makanuod kan tataramon—yaon man sinda sain sa bilog na kinaban. Madya na, Magbikol Kita!

Para sa mga buót maghiras nin mga artikulo, opinyon, suhestyon, asin iba pang buót nindong ipaabot samuya, mag-email sa [email protected] o imessage kami sa contact form sa ibaba.

An ortograpiya asin istilo sa lenggwahe na ginagamit kan Magbikol Kita nakasusog sa ginagamit kan Mother Tongue-Based Multilingual Education (MTB-MLE) kan Departamento kan Edukasyon. Ini tanganing an anuman na maipublikar sa idea hub na ini pwedeng magamit kan mga eskwela, urog na sa mga pampublikong eskwelahan.

I-message sana kami para sa mga hapot o anuman na buót nindong ipaabot sa samuya.

13 + 6 =

Magbikol Kita © 2021 Reserbado an gabos na karapatan