An solamenteng buhay na patron, bako sana sa Naga asin Camarines Sur kundi sa bilog na Bikol, iyo si Sal Fortuno.

Ginatos na mga broadcaster asin announcer sa radyo asin telebisyon an nag-aragi sa saiya, bilang station manager asin trainor, tanganing makanood nin epektibong komunikasyon sa ere.

Nagpuon bilang station manager kan dzGE, Filipinas Broadcasting Network (FBN), pagkagradwar sanang high school sa Ateneo de Naga kan dekada ‘60. Puon kaidto, nagparalangkaw an saiyang istatura sa broadcast industry. Kan sya magin general manager kan FBN, nasakop nya na an mga estasyon kaini sa Tuguegarao, Lucena, asin Legazpi.

Maski ngani may magayon na boses—asin magayon na agom—alagad nungka sya naglangkaw nin boses ta garo dai naaanggot maski may mga pasaway na kabuhan.

Minsan inaapod syang “Mr. Cool” kan kapwa broadcasters. 

An naaanggutan kan saiyang among na si Senador Edmundo B. Cea, presidente kan FBN, siya lugod, alagad tulos man na naaareglo asin naibabalik an katuninungan asin marhay na iribahan.

Maski taga-Rinconada, palibhasa nakaistar sa Canaman, nagin director sya kan CASURECO II, bilang representante kan banwaan na Canaman, Magarao, asin Bombon. Tulus-tulos syang napiling presidente kan pinakadakulang kooperatiba nin kuryente kan Bikol.

Sa pakikiiba, mayong madaog saiya. Naamigo nya si kaidtong Camarines Sur Vice-Governor Rolando Andaya Sr., asin topnotcher Board Member Judge David Naval. Sya an pinakahoben sa tolo. Huli ta amigo nya an gabos na radio station managers, napili tulos syang chair kan Kapisanan ng mga Brodkaster sa Pilipinas, Camarines Sur Chapter, sa amay na parte kan dekada ‘70.

Sya man an nagtabang sa mga ordinaryong announcers na makamukna kan Association of TV and Radio Announcers of Camarines Sur (ATRACS) tanganing magkaburunyog an mga nasa rank and file, magin mga professional sa saindang trabaho, asin matawan nin halangkaw na sweldo.

Bistado an boses nya bilang newscaster, may kredibilidad, alagad dai nagkokomentaryo kaya mayo syang kaiwal.

Kan sya imbitaran na magkandidadato bilang Board Member kan Camarines Sur, at- large, topnotcher tulos siya sa mga botante kan Iriga asin 35 banwaan kan Camarines Sur.

Nagbokal pa sya nin sarong turno bilang representante sa Sangguniang Panlalawigan kan Rinconada District.

Pakatapos kaidto, kinua sya bilang Vice-Governor asin naka-tulong turno, pinakahalawig sa historya kan pulitika sa Camarines Sur. Kan magkandidato syang congressman nakaapat syang turno asin napagayon nya an tinampo sa Rinconada sagkod sa banwaan na Balatan.

Kaya kan pakandidatuhon nyang congresswoman si Mrs. Jocelyn Faustino Fortuno, an saiyang esposa, nanggana ini nin pinakadakulang abante sa kalaban nya asin may magayunon na performance bilang chairman kan Bicol Regional Economic Development (BRED) committee, senior member kan appropriations committee asin iba pang importanteng komitiba sa Kongreso.

Kan sarong aldaw sana, nag-anunsyo si Congressman Sal Fortuno na dai na sya madalagan sa 2022, “for health reasons” asin dai man makandidato si Congresswoman Josal Fortuno huli ta iyan an saindang pangako sa mga taga-Rinconada: na matukaw nin sarong turno sana.

Nabigla an mga taga-media asin nakubhananan mga taga-Rinconada pati an bilog na Camarines Sur ta sa edad na 75, mabagsik pa si Sal Fortuno asin mismo si Congresswoman Fortuno. Magayon pati an saindang tandem, on the air asin off the air.

An hapot siisay daw sa mga taga-media sa Bikol na magkaka-igwa nin outstanding records and accomplishments arog kan mag-agom na si Sal asin Jo Fortuno?