Sunday, December 05, 2021, 9:52pm

JoSal: bulawan na iribanan

Published on Sunday, August 30, 2020, 12:25pm

Siisay an mahunà na an duwang college scholars kan pamosong Unibersidad kan Nueva Caceres (non scholae sed vitae)—an lalaki popular na newscaster asin station manager na maliputon an lagong kan boses, estudyante kan College of Commerce, saka an mestisang magayon, scholar, asin student leader kan College of Education—magkakaaguman sa Wedding of the Year kaidtong Abril 29, 1970, sa Peṅafrancia Shrine Naga City, duwang taon antes kan Martial Law?

Siisay an mahunà na an pambihirang kombinasyon na ini mabunga nin pitong aki—6 na babayi saka sarong lalaki, plus pitong makuapo, asin magigin makolor na riding-in tandem sa pulitika sa Rinconada? Mayong iba kundi sinda dating Congressman Salvio B. Fortuno asin si incumbent Congresswoman Jocelyn Faustino Fortuno kan Nabua, Camarines Sur.

Si Sal an tawong dawa magayon an boses, dai naglalangkaw an tono kun nagtataram, on-air man or off-air, iyo an pigtiwalaan sa pagpadalagan kan pinakadakulang Bikolano radio company, an Filipinas Broadcasting Network, Inc. (FBN) na pagsasadiri kaidto ni dipuntong Senador Edmundo B. Cea sa laog nin halawigon na panahon huli sa liputok na pagtubod saiya kan maisog asin madunong na outstanding provincial fiscal, bilang general manager. 

Nagpoon tulos sya nin halawig na karera sa serbisyo publiko.

Inot, bilang direktor kan Canaman-Magarao-Bombon district kan CASURECO II, dangan bilang pinakahoben na presidente kan kooperatiba, sagkod magin topnoptcher na bokal kan probinsya nin Camarines Sur (35 banwaan saka Iriga City), asin bokal kan Rinconada district.

Kan 1995, nanggana syang bise gobernor kan pinakadakulang probinsya asin nagsirbi nin tulong surunudan na turno, an pinakainot sa siring na posisyon sa historya kan Camarines Sur. Trangkilo asin produktibo an sangguniang panlalawigan: nagkaigwa nin opisyal na historya an Camariness Sur; an Mayo 27 idineklarang aldaw kan pagkatugdas, official nonworking holiday pati sa Naga saka Iriga, naibalyo an selebrasyon kan Kaogma Festival hali sa Naga pasiring sa Pili, minukna an Central Bicol State University of Agriculture (CBSUA), binuksan an pamosong CWC asin Lago del Rey, asin kadakol pang iba.

Kaya bakong makangalas na kan inot na magkandidato syang congressman kan Rinconada area, gana tulos. Pinanamit man syang sarong daog for congressman pero kan magbalik sya giraray bilang bise gobernador, nakatapos syang tulong brilyanteng turno bilang representante kan fifth district, and the rest is history. Sya an pigbibistong “Road Infrastructure King” kan probinsya ta 100% kan mga tinampo sa saiyang distrito napakarahay nya asin naipasemento o ispalto, pati Buhi asin Balatan, na haloy nagparaharalat na magkaigwa nin tultol na dalan.

Kan matapos sya kan turno bilang deputado kan 2019 rinibayan sya kan saiyang magayon na agom sa kaparehong puwesto.

Primero idto sa historya kan probinsya na an sarong broadcaster na pulitiko riribayan man saná kan saiyang agom na paratukdo na nanggana pati nin pinakadakulang lamang.

Kun iisipon an broadcast asin teaching profession parehong karera nin pagtukdo o edukasyon. An announcer sa likod kan mikropono, an maestra sa atubangan kan mga estudyante sa laog kan classroom.

Si Sal konsideradong Dean of Bikolano Broadcasters, pirang beses nagin chairman kan KBP asin pigmimirar na idolo kan ginatos na working broadcasters na nag-agi sa lindong kan saiyang liderato asin pagmato puon kaidto sagkod ngunyan.

Sya an nag-introdusir asin nagmukna kan inot na news department nin sarong local radio network: an dzGE sa Camarines Sur asin dzRC sa Albay na dating may mga sanga sa Tuguegarao, Cagayan asin San Pablo City.

An FBN an pinakamidbid na training ground nin broadcast sa Bikol na nagprodusir bako saná nin mga outstanding announcers asin DJs kundi pati mga darakulang lider-pulitiko: mga alkalde, bokal, bise gobernador, gobernador, asin congressman, mga station managers, KBP chairpersons, asin founders kan Association of TV and Radio Announcers of Camarines Sur o ATRACS na sya an solong adviser. Si Sal iyo an Santa Claus kan broadcast media taun-taon sagkod ngunyan.

Sa ibong na lado, si Jo Fortuno na nagpuon bilang public school teacher, nagin pamayo kan Alternative Learning School (ALS) sa Naga asin nagin lider/spokesperson kan Naga City Teachers Association (NACITEA). 

Natawan nin award o minidbid bilang Most Outstanding Teacher of Naga City, Camarines Sur, asin sa intirong Pilipinas. An ambisyon saná kuta ni Jo bilang first lady ni Sal asin bilang mabuot asin mahigos na agom nin sarong pulitiko.

Idto palan, dai aram kan kadaklan, pig-aadalan nyang entero bako saná an hiru-hiro kan saiyang agom bilang serbidor kundi an mga kaisipan kaini asin pangaturugan.

Kaya kan manggana sya  bilang primerong babaying representante sa kongreso kan Rinconada, an pinakadakulang political district kan Camarines Sur, dai nagngalas an mga tawo kan sya pakaputon bilang chairperson kan mahalagang Committee on Bicol Recovery and Economic Development (BRED).

Edukasyon para sa mga kaakian asin mga hobenes kan Rinconada an saiyang ipinaglaban durante kan karampanyahan sagkod ngunyan na sya nakatukaw na.  

Sunod sa edukasyon iyo an hanapbuhay, trabaho, dagdag na ingreso sa kada saro sa saiyang distrito.

Gigibuhon nya iyan sagkod na matapos an saiyang turno.

An saiyang partner na si Sal nasa likod saná asin kataid nya man giraray sagkod ngunyan.

Ini an tawong dai nalilingaw sa mga amigo puon sa pagkaaki sa Nabua, sa high school sa Ateneo (sya an Yoyo King kan dekada ‘60), asin mga kabarkada sa radyo asin telebisyon mantinido nya an liputok na relasyon.

Sabi kan iba, sya na an amigo na dadamayan ka maski magdamlag. Sabi ni Mario Ochoa, si Salvio Fortuno an masalbar asin mataong swerte bako saná sa Rinconada kundi sa Bikolandia.

Mayo syang kalaban sa pulitika ta maski sa ibong na kudal kan partido amigo niyang pirmi, sabi ngani kaiyan mayo syang maraot na tinapay.

An hapot ngonyan bako kun ano an puturo ni Sal o ni Jo, kundi kun ano an puturo ni JoSal sa mga maabot na taon?

An saindang mga aki: Joanne, Cherylyn, Anelle, Dessa, Josa, Jesette, JP: mga makuapo: Sophia, Jada, Basti, Rylee, Ethan, Natalia, EJ (+). 

Si Sal an numero unong paraimbento nin mga tataramon na ginagamit asin naglalakop bako saná digdi kundi sa ibang lugar man—“Maurag nang kadikit,” “awtomatik,” asin an pinakabantugan na “pangyayari!”

Dai ta na muna isipon kun ano an plano kan duwa sa pulitika an importante na sinda nagselebrar pa saná kan saindang ika-50 anibersaryo bilang mag-agom kan Abril 29.

To Cong JoSal: Congratulations and Happy Golden Wedding Anniversary.

Mabuhay!

.

Ernie Verdadero
Si Ernie Verdadero saro sa mga beteranong harigi kan radio broadcast sa Bikol. Saro man syang dating elehidong opisyal kan gobyerno asin man artista sa mga pelikulang Bikol.

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.

Importanteng Paisi: An Magbikol Kita minatao nin galang asin nagmimidbid sa katalingkasan kan lambang kag-ambag na parasurat na makapaglahayag kan saiyang personal na ideya, opinyon, o panànaw, sa pagtubod na ini nakasusog saka nakagamot sa pag-adal, pagsaliksik, asin hararom na paghurup-hurop. An indibidwal na mga artikulo dai nagsasalming sa pangkagabsan na paninindugan kan Magbikol Kita.

Kag-ambag na mga Parasurat

Kenneth Isaiah Ibasco Abante

Khryss Arañas

Mae Diane Azores

Nephtaly Botor

Niles Jordan Breis

Luis Cabalquinto

Jethro Calacday

Greg S. Castilla

France Clavecillas

Christian Dy

Maria Leny Felix

Dennis B. Gonzaga

Jaya Jacobo

Jingjin 淨近

Victor John Loquias

Vic Nierva

Pen Prestado

Joseph Reburiano

Adrian V. Remodo

Aika Robredo

Ronald ‘Bong’ Rodriguez

Jenn Romano

Javier Leonardo Vitug Rugeria

Jay Salvosa

Sari Saysay

Jonas Cabiles Soltes

Kerwin Orville Tate

P. Francis Tordilla

Melba T. Vera Cruz

Ernie Verdadero

Magbikol Kita is published by

We create blogs, videos, websites, graphics, and social media content so you can engage customers online and offline. Visit Creative Coconut Ph for ideas and to contact us.

Resibihon an mga artikulo sa email

Magsubscribe sa mailing list kan Magbikol Kita. Resibihon an mga artikulo direkta sa saindong email.

An Magbikol Kita sarong adbokasiyang nagtutulod, nagpapararom, asin nagpapahiwas kan paggamit sa mga tataramon na Bikol sa online na kinaban. Orihinal ining sarong midyum nin paghiras nin kaaraman dapit sa lenggwaheng Bikol para sa mga nagtutukdo asin nag-aadal kan tataramon. An paghimo kan website na ini sarong lakdang nin pagpahiwas kan sakop asin abot kan Magbikol Kita tanganing magin sarong kamalig nin impormasyon para sa mga Bikolnon—asin mga buót makanuod kan tataramon—yaon man sinda sain sa bilog na kinaban. Madya na, Magbikol Kita!

Para sa mga buót maghiras nin mga artikulo, opinyon, suhestyon, asin iba pang buót nindong ipaabot samuya, mag-email sa [email protected] o imessage kami sa contact form sa ibaba.

An ortograpiya asin istilo sa lenggwahe na ginagamit kan Magbikol Kita nakasusog sa ginagamit kan Mother Tongue-Based Multilingual Education (MTB-MLE) kan Departamento kan Edukasyon. Ini tanganing an anuman na maipublikar sa idea hub na ini pwedeng magamit kan mga eskwela, urog na sa mga pampublikong eskwelahan.

I-message sana kami para sa mga hapot o anuman na buót nindong ipaabot sa samuya.

5 + 2 =

Magbikol Kita © 2021 Reserbado an gabos na karapatan