May sarong grupo nin mga senior broadcasters na gustong buhayon liwat. Ini an Association of TV and Radio Announcers of Camarines Sur (ATRACS). Bako saná para sa marhay na iribahan, pagkasararo, asin propesyonalismo, kundi tanganing matabangan an mga taga radyo asin telebisyon (kabali na an mga technicians asin mga taga peryodiko) na may mga hilang asin iba pang pangangaipo.

Sa sarong intrebista sa radyo asin telebisyon kan Sabadong aga ki Sammy Garcia, primerong presidente kan ATRACS asin retiradong manager kan Radyo ng Bayan, tulong beses na nagin chair kan KBP, asin ining alang-alang, nagka-uroyon na buhayon liwat an ATRACS.

Sa presenteng kamugtakan na dakol na mga broadcasters arog ki David Dollano, David Nopre, Mrs. Belen Babar, asin an technician na si Weng Morato Nieva, na may mga hilang ngunyan, kaipuhan na marhay an tabang kan mga kabado sa propesyon, makatabang man lang sa bulong, paragastos, asin iba pang pangangaipo. Kuta na ngani, kun may panahon, bisitahon man ninda an mga pasyente sa ospital o sa harong.

Kan inot an ATRACS nagamit sa politika, mala ta igwang sarong dakulang politiko, kan dai nya mapakinabangan an organisasyon, nagsugo syang gadanon ini labing sarong dekada na an nakakaagi.

Alagad ngunyan mayo na nin politika sa ATRACS. Pati an ayuda na itatao sa mga nanunungdan na pasyente dapat direktang itao sa saindang sadiring bank accounts na dai na maagi sa kamot  kan ATRACS tanganing mayong masabi. Leg work na sana an trabaho kan volunteer organization.

Dyan na mahihiling an sinseridad kan lambang broadcast practioner asin an pig-aapod na serbisyo publiko.

May mga gusto nang magtao kan saindang boluntad na tabang,  arog kan mga senior broadcasters na sinda Elmer Abad na saro sa mga founders kan ATRACS, Judge Celso Baguio, Director Ric Diaz, pati an balikbayan na si Jojo Amador. Si Ervin Borja kan OK FM asin PBN 5, Ernie Abragan asin Wally Vargas kan dwLV FM, maski si Congressman Sal Furtuno na konsideradong godfather kan Bikol media, matarabang man. An balikbayan na si Jing Florece haling Canada na orihinal na myembro kan ATRACS maayon man.

Sa abroad, apwera ki Sammy Garcia na maistar sa New York nin sarong taon, an mga arog ki Fiorel Salvo, Noli Orbeta, Jun Lagrimas, Vic Samson, an parasurat na si Prof. Greg Castilla, Al Villamora, Awel Aureus matarabang man. 

Digdi sa Bikol an mga retiradong broadcasters arog ki Atty. Henry Briguera (original ATRACS chair kan 1977), Donya Lina Paglinawan, Donya Elaine Parma Orong, Atty. Peachy Alfelor-Moraleda, Manager Al Ubana, Don Zing Paglinawan, director Salvador Royales, Badong-Badong Alcantara, Vangie Pontejos, asin syempre an bagong Congresswoman na si Josal Faustino Fortuno, matarabang man. 

Pagirumdom kan ATRACS sa mga ngunyan mababaskog pang broadcaster asin mediamen na magurang man sinda asin mangangaipo man nin tabang pag-abot kan panahon. Ngunyan magdeposito na sinda tanganing may butbuton ngapit.

An KBP kaya organisasyon saná kan mga kapitalista, may sadiri, asin operators kan mga istasyon asin networks nin mga radyo asin telebisyon. An mga managers representante saná ninda sa lokal na KBP. Marhay kun may ikahirak, kun mayo, pasensya na.

An mga accredited members kan KBP igwa man 100k pesos na insurance kun magadan. Kun dai accredited, sorry na lang.

Arog kaiyan an buhay, swerte, o kadimalasan, kan sarong broadcaster o mediaman.

.