An mga taga-media, magin broadcaster o print mediamen, mga tunay na frontliner. Maghapon, magdamlag, pagpuon pa saná kan kwarentina, 24/7 pirmi sindang nagtratrabaho, nagpapalakop kan impormasyon dapit sa mga pangyayaring katakod kan CoViD19 pandemic na ini.

Garo man lang medical workers, sinda mga bayani man, ta haros dai man magpuruli sa saindang mga harong, urog an mga reporter na nag-iinterbyu kan mga nanunungdan sa gobyerno, mga doctor asin mga nars, kun minsan mga suspetsado pang may impeksyon nin Coronavirus.

An mga taga-media dai nagrereklamo dawa gurano kasakit kan trabaho. Kun normal ngani an panahon, kun suarin may bagyo o anuman na klase nin kalamidad, saka lugod sinda dai nakakapuli sa harong, harayo sa pamilya ta pirming tutok sa trabaho. 

Kayod sanang kayod. 

An mga taga-media, magin mga broadcaster sa TV asin radyo o mga parasurat asin reporter sa peryodiko, bantugan sa saindang komunidad, respetado, konsideradong mga opinion/influence leader sa saindang lugar.

An problema lang kan mga taga-media ta hard life, hababa an income, maluya an hanapbuhay.

Kun mayong sideline—legal man o illegal—gutom siya asin an saiyang pamilya. 

Makahirak.

Totoo yan sa mga taga-media, urog na sa probinsya arog digdi sa Bikol, magin sa Naga o Legazpi.

Sa Mega Manila mas marhay an buhay kan mga taga-media. Nagtarapos sa mga bantugan na eskwelahan siring kan UP,UST, FEU, PUP, asin iba pa, nag-adal nin journalism kaya pagpuon ninda sa trabaho igwa sinda nin bastanteng preparasyon kaya nakakahagad nin halangkaw na sweldo asin dakol na benepisyo.

An mga may sadiri kan broadcasting network asin mga diyaryo o magasin darakulang negosyo o korporasyon na may dakulang kapital duman sa Metro Manila.

Alagad digdi sa probinsiya, an mga may sadiri nin estasyon asin lokal na dyaryo saradit man sanáng negosyo kaya dikit o mayo nin dakol na kwartang panpasweldo. Lalo na ngonyan sa panahon nin kwarentino asin lockdown. Bukas an radyo, TV, asin peryodiko lokal, pero sarado an mga negosyo, an mga tawo yaon lang sa laog kan mga harong.

An ibang mga trahabador, obrero, asin empleyado mayo nin gibo, mayo man nin sweldo pero an mga taga-media may trabaho pa.

Sa totoo lang kadakol akong naka-ulay nin mga taga-media na sige an aragrangay ta tios na marhay.

Pero an kadaklan sainda desidido pang magtrabaho sa ngaran kan serbisyo publiko.

Igwa man pati sinda nin media pass tanganing makalibot-libot na dai na-iistorbo sa mga checkpoint.

An mga seniors na mediamen, ta vulnerable sa virus, pahingalo muna.

Sa panahon na ini na may Social Amelioration Program(SAP) para sa mga kinapobrehan o poorest of the poor, mga senior citizen, mga PWDs, asin nawaran nin trabaho o hanapbuhay dahil sa CoViD19, an mga taga-media mayo lamang. 

Nganga.

Mayo lamang panao an PIA o an Presidential Communication Operations Office ni Sec. Martin Andanar asin pati ngani daa an NGCP na igwa nin sadiring media organization na working press corps mayo man panao.

Magayon ta igwa nin ibang politiko na dakula an puso asin hararom an bulsa ta dai nakakalingaw asin nagtataga-witik man.

Sabi, an media iyo an pig-aapod na fourth estate o ika-apat na harigi kan sosyudad, ta kun mayo yan, tagilid an kinaban. Sa panahon kan mga fake news ngunyan, urog na sa social media mahalaga an serbisyo kan mainstream media sa pagpalakop nin tamang bareta asin impormasyon kaya dapat pagianon man an buhay kan mga mediamen.

Tawan nin gabos na benepiyso asin halangkaw na sweldo tanganing mamantinir an saindang iginagalang na estatura sa komunidad.

Inaapudan nyato an mga nanunungdan sa gobyerno asin sa pribadong sektor asin KBP na matawan nin pusog na Social Amelioration Program an mga tagamedia o sa simpleng tataramon Media Amelioration.

An Publishers Association of the Philippines Inc. (PAPI) kun bakong gadan na, il-igon na.

(Kaayon sa media men, an mga technician, office employees kan broadcast, sa print mga trahabador sa imprinta asin opisina kan dyaryo).

.