Haloy na kutang may libro akong naisurat dapit sa mga Bikol asin pakunswelo ni David Dollano na sa radyo na tunay na Bikolista. Kundi sa kaaantabay bilang radio fanatic, nalingawan kong isurat sa papel arualdaw an mga pambihirang Bikol na hararom asin hababaw pero interesante. Ngunyan pa saná ako nagpupuon magsurat sa papel kan mga terminolohiya na gamit niya sa radyo na dai gamit kan iba.

Namundag sa Bula (Rinconada), nagdakula sa Calabanga, nag-eskwela sa Naga asin ngunyan naka-istar sa Canaman an banwaan [Ed. subuot] na pinaghahalian kan “standard Bikol”. An saiyang dipuntong ina sarong maestra, Batangeña, pero an tono ni David on-air or off-air Bikolanong-bikolano, mayong Calabanga o Bula accent.

An saiyang ama na propyong taga-Bula—Antero Habana Dollano—dating provincial guard na pigbabansagan na Samuel Bilibit ta lakaw sanáng lakaw, dai naglulunad. Sya an numero unong tagahanga ni David sa radyo. Antes syang nagadan sa edad na 97, pirmi pa syang nagbibisita sa istasyon na pigpoprogramahan ni David. An dai aram ni Don Antero, sya man an idolo kan saiyang sikat na aki sa linya nin disiplina asin pakikipag-kapwa.

Bako pang broadcaster si David kan amay na parte kan dekada 80, sinda ni Irvin Borja an saiyang barkada, mga sikat nang orador asin student leader sa UNC. Nakanood syang magin announcer—live—sa 27 barangay kan Naga bilang operator sa sound system ni dating Kagawad Popoy Hernandez, asin emcee sa mga programa asin pabayle kan grupo na dating Naga Mayor Lut del Castillo, Vice-Mayor Pat Obias, asin pag-iriba.

Annoucer na sya sa BBS-dwLV kan magkandidato para konsehal kan Naga pero nadaog, kaiba si Jesse Robredo kan 1988, nagparadiskurso na sya  sa gabos na barangay kan ciudad. An pangako nya papakaputan nya an saiyang tropeyo sa mga daraga kun sya mangana. Mala ta nadaog. Sa linyada, maski daog si David, gana sinda Luis Ortega asin si Alfredo “An Masalbar” Cabral bilang mga konsehal sa inot na turno ni JMR, alyas Pogi.

An karera ni David nagpuon sa mga sidewalk sa Centro kan Naga bilang shine boy asin istambay sa Plaza Rizal. Gulpi syang namidbid na mga tawo asin nadangog nya sainda an gabos na klaseng tataramon lalo na sa Bikol—pati mga katarantaduhan.

Napangagom nya an magayon na si Melba Chavez, sinda may tulong aki, duwang gwapong lalaki asin sarong magayon na daraga, gabos tapos sa kolehiyo.

An pigbibiliban saiya kan saiyang mga taga-hanga iyo ta marhay siyang magmato-mato sa saiyang pamilya lalo na sa mga tugang na maluya an kayod.

Kan aki pa siya sabi kan mga taga-Calabanga si David iyo an kakawat ni Congressman Gabby Bordado mala ta sya an caddy sa karawat na golf sa Barangay Del Carmen. Ngunyan, sya an Buradol King sa Metro Naga Sports Complex kada summer, on-air or off-air, on-campus, or off-campus.

Nagpuon syang magsikat sa dwLV kaiba si Station Manager Butch Robredo, an saindong lingkod na Production Manager, sinda Rick Diaz, Cris Rances, Gil Basmayor, Oscar Monte Agodo, Armi Asor, Ato Peña, asin Jimmy Letada. Saro sa mga reporters kaidto an ngunyan mayamanon na si Noel de Luna.

Kan magin politiko an saiyang mga pag-iriba, nagbalyo siya sa RMN-dzHN, ki Celso Baguio, sa Queborac, Naga City. Duman nagin sikat syang emcee sa entablado sa mga liveshow. Paborito sya kan mga tawo ta grabe an sense of humor, nakakapangisi maski ngani sya mismo dai nagngingirit. An saiyang pirming katambal sa stage iyo si Bert delos Martirez, urog na sa pamusong search for Mrs. Bicolandia.

Kan magbukas an dwNX FM, kinua sya bilang primetime announcer kaya sya an pinakaprimero asin solong broadcaster sa Bikol na binayadan nin royalty kan top management na ginatos na ribo. 

Sosog sa istorya kan magpa-Manila si David ta makubra kan saiyang kwarta asin kaka-ulayon kan mga opisyales sa itaas, pigkakabit pa sya ni SM Al Ubaña pagbalyo sa pedestrian lane kan mahiwas na tinampo sa Manila.

An dwNX an primerong FM station sa Bikol na AM an programming. 

Sa NX, sya an nag-introdusir kan chika sa bareta na nagin bantugan na marhay puon kaidto sagkod ngunyan. Sya man an brodkaster na hasyendero_para-ataman nin baka asin paramais (bakong corny). Haling NX, nagbalyo sya sa dzGE kun sain sya urog pang suminikat kaibahan si Atty. Henry Briguera asin iba pa.

Sa halipot nang panahon nagbalik sya sa BBS. Ngunyan yaon na sya sa dwOK FM-PBN TV 5 asin Facebook Live worldwide aga-aga. Riding-in-tandem sinda ni Irvin Borja.

Sabi may mati-mati si David.

Ngunyan pa lang, iniimbitaran ko an gabos na mga paradangog na i-record asin i-save an mga programa ni David tangarig maitago an saiyang magagayon asin bulawan na Bikol.

Pero an pinakaremedyo bako an dialysis kundi an pagbalik-balik ninda ni Melba sa Blessed Sacrament.

An orag ni David iyo na, imbis na iwalon o tiraduron o talayupon, inamigo niya lugod si Goliath, an saiyang bossing sa kinaban.

.