Sa gabos na sektor kan ekonomiya, agrikultura sana an nagdakulo nu Abril sagkod Hunyo nganang taon. Ibig sabihon, maski ngani ayo pandemya, ayo mga oportunidad sa agrikultura. An bilog na ekonomiya, nagsadayut nin 16.5 percent, pero, an agrikultura, nagdakulo nin 1.6 percent. Kun arin pa su pirming napapabayaan na sektor, amo pa su luminuwan na matugon nganang krisis.

Nu usad na taon, kaiba nin mga kaklase ko nung high school, nagtugdas kami nin usad na lettuce farm sa Camalig. An ngaran, Mayon Greens. Saday sana an operation, ta kumbaga, sa ngana, amun-amon pa man saná. Pero, maski pa bukon kami full-time sa pagmaneho nu negosyo, ayo man pinagadelihensya maski ito. Klarong marhay: ayo puturo an agrikultura.

An Mayon Greens, hydroponics an metodo na gamit. An ipinangtugdok namon nin greenhouse, recycled kaya bukon marhay magasto. Ta su usad na kaiba ko, engineer, nagibuhan man namoun nin paagi para mamanipular an pag-iwag nin tubig sa tanuman dangan an temperatura sa greenhouse. Modernong agrikultura, kumbaga, pero bukon marhay magasto.

An angal sadi ni E. F. Schumacher “appropriate technology,” o teknolohiya na bagay sa pangangaipo dangan kapasidad kan naggagamit. Nung 1970s, ta puro diktador na nagahidali gibuhon na “developed country” an mga namamayo sa mga nasyon sa Asya dangan Africa, ipinirit sa mga parauma su mga makina na dipisil palan irahayon, padalaganon, dangan manteniron. An resulta, nalubog sa utang na impinambakal nu mga makina su mga nasyon na naggamit, habang indi man naparahay an agrikultura sa mga pobreng nasyon.

Dakul pa kitang pwedeng maingukudan ki Schumacher, kagsurat kan Small is Beautiful: Economics as if people mattered. An pinakaimportanteng prinsipyo ni Schumacher, an ekonomiya dapat naipapaluwan an pinakamarhay sa tao—an madanay na pagbuhay nin tao. Indi ta maseparar didi an agrikultura. Bukon ta ugmahon ka ngani nung nagatanom ka sa balay habang quarantine?

Sa mga nakaaging kolum, pinag-urusipan ta na maski ito, basta natitipid dangan nasasaray, makatabang sa puturo. An pagtanom nin prutas dangan gulayon, an pagpadakulo nin manok, urig, o iba pang hayop para sa konsumo kan pamilya, makatatabang sa sadiring puturo. Nakatabang man pati sa kinaban. Primero, nababawasan an inangal na carbon footprint san pamilya, ta indi na kaipwan ibyahe an pagkaon na dyan na sa balay. Ikaduwa, nakatabang sa industriya dangan sa ekonomiya, ta ppag dakol an pagkaon, luway-luway saná an paglangkaw nin presyo nin iba pang babakalon. Mas dakol an kayang bakalon san sweldo, kaya competitive an industriya.

Nganang krisis pati, pinakaimportante an seguridad sa pagkaon. Indi ta aram kun kinano matatapos an krisis, pero kun ayo kita masustansiyang pagkaon sa lamesa, mas magaan tang malalampasan yadi.

Kaya, kung ayo pwedeng tanuman sa balay, magtanom kita nin makakaon. Wara pa ako ngana nakikitang solidong oportunidad para sa retail investment sa kumpanyang agrikultura an pinaka-linyada, pero sigurado ako na abot an panaon na magkakayon nin mga makusog na kumpanyang pwede tang pagtiwalaan nin investment. Magláom kamo na pag nakakita ako nin oportunidad, kamo an primerong makaisi.

Sa ngana, su kaya ta nganay gibuon. Ngamin man na pag-invest, pwedeng ikumpara sa pagtanom para ayo anihon pag-abot nin panaon. An pagtanom, syempre, pag-invest man.

.

.