Gamit ini bilang panhapin o pangkutson sa mga mapapasaon o sensitibong bagay tanganing dai mapasâ kun kaipuhan ibyahe. Saro na man siguro ini sa pinaka-therapeutic na materyal na naimbento nin tawo, nin huli ta mga masiramon papurutukon an mga saradit kaining air bubbles. Maski damulag na ako, libang na libang ako magparapusi pasaru-saro kan bubbles, kaya pag may online delivery na nag-aabot dati sa opisina, nakiiagawan ako sa bubble wrap.

Speaking of online delivery, kaining mga nakaaging bulan, saka pa saná ako nagusto—o napiritan sa puon—na magbakal nin gamit o kakánon sa paagi kan sakong cellphone. Takot kaya ako dati ta dakol bagang mga istorya na iba man an nag-aabot na item sa saimong inorder. Tuod akong magbakal sa mall ta nakikilatis o napupurbaran ko nguna an babakalon kong produkto, kaya bihira akong magbakal online. Kun igwa man akong babakalon online, malamang kawat iyan sa Nintendo Switch o Steam.

Alagad nagbago an sakong buying habit, puon kan nag-lockdown digdi sa Quezon City. Masakit magluwas nin harong. An inot kong nagin problema iyo an paglabá ta nakaasa ako sa laundromat na kaipuhan ko pang lakawon nin kabangang kilometro. Kan inot na bulan kan lockdown, ako mismo an naglalaba. An problema: darakulaon an mga bado ko, kaya kaipuhan kong ibabad dangan kurukusuon na marhay tanganing masiguro kong malinig. An resulta, nagrurulugad man an kamot ko. Kaya napiritan akong mag-order nin washing machine. Inabot nin tulong semana si delivery, kasabay na kaiyan si tig-order kong hose para nakakabit na ini sa gripo. Dakulang tabang ta igwang online shopping.

Saro ko man na problema iyo an pagsaod nin kakanon. Dati, madali sanáng magsaod sa Arayat Market, lakaw ka saná pasiring duman, may mababakal ka nang pwedeng iluto sa masurunod na mga aldaw. Kun maggrocery man kami sarong beses saná kada bulan. Pero dahil sa lockdown, nagin penitensya an Marso asin Abril ko ta bawal magbyahe an mga traysikel, kaya naglalakaw talaga ako na may bitbit magagabat sa abaga papuli sa harong. (Ngunyan, tatao na ako. Naggagamit na akong backpack.) Kaya kan nadiskubre ko na halos gabos kong pangangaipo pwede ko na sanáng halaton sa kwarto ko, sa online shopping na ako nagsarig.  Pag hinuhugakan akong magluto, mag-order saná, magpili sa Grab o Lalamove, o kaya mag-order diretso sa resto saka ipasundo sa Angkas, solb na an pangudto o pamanggi. Pag nag-crave ako nin kape ta tinutungka minsan sa trabaho, na-order saná akong kape sa Tim Hortons o kaya Starbucks, pero para makatipid, nagbakal na ako nin sadiri kong panggiling saka pansarà nin kape. Kan nagdesisyon akong ayuson an laman kan kwarto ko para magin home office an setup, nagbakal akong bagong kama asin kutson, bagong shoe rack, artwork bag, asin vacuum cleaner. Gabos inorder ko online. Gabos convenient bakalon.

Alagad, narisa ko an sarong dakulaon na plastik nin basura na sakong natipon. Linaag ko duman gabos na packaging na ginamit sa mga binarakal ko: bubble wrap sa mga mapapasaon na appliances, mga plastik na panggakod, mga pidaso nin cling wrap (para sa mga darakulang items na kaipuhan pag-iribahon), mga gurumos na packaging tapes, asin styropore para sa washing machine. Igwa pang boxes nin corrugated cartons, na may papel na fillers. Lain pa sa mga nasambit, may basura man hali sa inorder kong mga pagkakan sa mga food delivery apps. Sa sarong semana nakakapanô ako nin saro o duwang garbage bag.

Kaya napaisip ako, kun ako na solo saná sa buhay, kayang makatipon nin arog kaining basura, ano pa daw si mga tawong mas dakol pa an binabakal sako online—si mga nakaarabang kada may online sale, gurano daw kadakol na basura an natitipon mi gabos? Medyo masakit timbangon an convenience na naiitao kan online delivery saka an epekto kaini sa kapalibutan urog na ngunyan na may pandemya, na grabe an pagpugol sa mga tawo na magluwas nin harong.

An convenience na dara kan online delivery garo man saná bubble wrap. Sa panahon nin pandemya, igwa ining darang proteksyon (dai ta kaipuhan magluwas asin ma-expose sa CoViD), gian sa buhay (bawas pagal o stress), asin kaugmahan (therapeutic baga pag yaon na si binakal mo).  Alagad dakula an karibay kaining economic model na ini sa satuya asin sa kapalibutan, ta mantang nagpapara-add-to-cart kita, dakol na basura an natitipon ta. Apwera sa mismong packaging kan item na binakal ta, pinapatos pa ini nin bubble wrap o cling wrap dangan ikinakahon tapos pinapatos giraray nin cling wrap saka pinapaikutan nin damot na packaging tape.

Kan nakaaging taon, nagkaigwang ban sa paggamit nin single-use plastics sa mga supermarket asin department stores. Dakulang tabang an polisiyang ini sa pagbawas kan paggamit nin single-use plastic. Alagad, an packaging sa mga online delivery duru-duroble an pagkapatos! 

Habo ta man na an mga inorder tang mapapasaon mag-abot sato na ready nang i-kintsugi urog na kun minsan na nagrurulupad ini sa mga kamot kan mga nagdedeliver, pero dapat may maisip kitang paagi nganing mainaan an basurang natitipon ta.  An bubble wrap asin iba pang plastic, dai sinda tulos matutunaw. Matinir sinda sa kinaban maski mayo na kita. An mga kumpanyang nasa online delivery, dapat mag-isip nin mga alternatibong packaging (biodegradable plastic, fungi-based foam) na pwedeng magamit sa pagpatos nin mga mapapasaon asin sensitibong mga bagay. Kita bilang parabakal, kaipuhan ta man mag-isip kun kaipuhan ta bayâ an satong mga binabakal online. Kaipuhan tang magin makusog an buót laban sa tentasyon urog na kun matindi an artificial intelligence (AI) na gamit kan shopping app ta. Halimbawa, pag nagbakal ka nin washing machine, may algorithm na tetentaran kan magbakal man nin plantsa, kalan, ref, asin mga saradit na appliances. Bistadong-bistado nya an saimong buying behavior susog sa mga tigsearch mo o kaya activity mo sa iba mong social media accounts. Risa man na tigtutuod kitang mag-asa sa economic model na ini, kaya kaipuhan tang mag-ebalwar kan satuyang mga gawi bilang konsumidor, ta tibaad matapos kitang malibang kapupusi nin bubbles kan bubble wrap, an ipapamana ta sa mga makuapo ta iyo an tambak na basura.

.