May kalawigan sa buhay ko na naguyod an sakong isip kaiba kan mga Bikolanong nadara kan naglakop kaidtong pag-isip kolonyalismo, na dapat ikasupog saka tawadan paibaba an sadiring tataramon na Bikolnon. Urog pa kan nag-adal ako sa mga eskwelahan na pinagbawal an pagtaram nin Bikolnon, ta may magabat pang kastigo kun ika mapasala.
Dai ko pinagbabasulan an pagkanuod kong magtaram saka magsurat sa tataramon na Ingles. Dakula an kaugmahan ko kaidto kan an kainut-inuti kong naipublikar na sinurat nagluwas sa English-language na The Philippines Free Press. An pagmati ko kaidto garo baga nagsakat ko an ikapitong iskalon kan langit.
Sa kalawigan, an sakong hinimong mga pagsurat na napublikar saka natawan nin mga awards puro gabos nasa lenggwaheng Ingles, digdi sa Pilipinas saka sa iba pang nasyon.
Alagad, kun tano ta kan nasa Estados Unidos na ako, luway-luway na dinulok ako nin kapungawan, bako saná sa mga lugar kan banwang sakong pinangakian kundi pati sa pinakainot kong nagimatan na tataramon. Napag-isipan ko na an kagayunan, an kadunungan kan tataramon na Bikolnon daing kadaugan sa ano man na tataramon sa bilog nin kiinaban.
Kan nagsunud-sunod na akong magsurat sa tataramon na Bikol, nagin urog an paglinaw saka pag-ugma kan hirong pagpahayag ko kan mga burak asin bunga kan sakong pag-isip, pinag-agihan, saka imahinasyon.
Sa pagmati ko, dai nang kapunduhan an kaugmahan kong ini.
.
0 Comments